سلاحي السري
أهلا وسهلا بمحبين القلم !
مرة واجهتك مشكلة تخلي خطك وكتابتك على سطر مستقيم اذا الورقة مو مخططة أوبتخط على قطعة خشب مثلا”!؟
أو تحتار شلون تخلي الكتابة بين السطور بنفس المسافة والأبعاد بدون ماترسم خطوط واللي ممكن ياخذ منك وقت أكثر..
تبي شي سريع بدون عوار راس
عندي لك شي حلو وعملي! يخليك تحب عملك أكثر..
أداة الليزر.. المتعدد الاستخدامات من موازنة تعليق اللوحات أو المهندسين اللي يستخدمونه في عملهم في التخطيط والبناء
أما في حالتي ، استخدمه في مشاريعي الكبيرة مثل اللوحات الخشبية أو الورقية الكبيرة اللي يحتاج لعمل وتركيز الكتابة على سطر ثابت..
أدور العملي والسهل, وين ماهو موجود
أنا وراه
طيب شلون!؟
الطريقة:
واحد/ في البداية أحسب المسافات بين كل سطر والثاني بناء على حجم القطعة اللي بشتغل عليها
اثنين/ بقلم رصاص أو بطبشور على حافة القطعة الجهتين أقصى اليمين واليسار بالتساوي
ثلاثة/ من بعد ما أتأكد من القياسات ، أبدأ أشتغل بكتابة المسودة والليزر عندي شغال ويمشي معاي.. سطر سطر..
أربعة/ أخر شيء خلاص أبيض العمل بقلم حبر وأمسح المسودة وانتهينا
هنا فيديو قصير نزلته بحسابي الانستاغرام في تنفيذ أحد الطلبات الخاصة يشرح الفكرة ، لكن بما ان القطع صغيرة هنا في الفيديو ما احتجت احدد الجهتين المهم
تكون الكتابة مستقيمة في قلب القطعة
المهم إني أوصل لكم الفكرة
واااو اختصرت على نفسي وقت في تحديد الأسطر وانت تقدر تطبق هالفكرة على أشياء ومشاريع كثيرة عندك بالبيت
اشرايكم بالسحر ؟ عجيب صح !؟ جربوا الطريقة وقولوا لي شرايكم؟
واذا عندكم طريقة ثانية معتمدينها علموني خل أستفيد من تجاربكم
الليزر أخذته امازون سعره حلو وبمتناول اليد
.. مو المهم الماركة أو البراند اهم شي الأداة تأدي الغرض وبس
وقت سعيد
أميرة
